حدّثتني جدّتي -الكاتب الشاعر نبيل نصرالدين 2013

الكاتب الشاعر نبيل نصرالدين 2013

حدّثتني جدّتي -
من كتابي الاول "عناقيد الدوالي 1992" نبيل نصرالدين

كنّا نساعد الزلام في كلّ الأعمال، في الحراث، الحصيدة، الرّجيد ونحش للعنزات، نحلبهن، نجبّن ونعمل زبدة ولبن، ونزق ميْ من العين في التّناك والخوابي والجرار والبوط على رأسنا وجه النّهار، ننشل الميْ في السّطل بالدّور. ونسقي مساكب الدّخّان، نزرع ونشكّ، بعدين نساعد في تحطيط الجْمال المحمّلة في القمح، العدس، البطّيخ، الشّمّام والخروش، وننشل من البير ميْ ونسقيها. العجنة كانت لعشر أيام نعجن ونخبز " عالطّابون" ومرّات نخبز في " التّنور" وناكل مع زيت زيتون ولبنة " زقاليط". كان اسم الخبز كراديش، هذا غير خبز " الرّخو" و " الصّاج" والكماج. بعدين كنّا ننشّف زبل البقر على السّطح، هذا كان يُستعمل للطّابون حتّى يجمّر الحطب فيه، ونزُق " الجفت" من المعصرة بعد دراس الزّيتون ونستعمله لتشعيل الطّابون. كنّا نغربل القمح للسَلِق وللجريشة، برغل وصويل للطحين، ونحمّله على الدّواب ونطحنه في البابور.
كانت الطبخة ليومين، الكلّ ياكل من الطّنجرة ويقولوا الحمد لله " مش زي" اليوم خمس ست اشكال على الوقعة. كانت الطّبخة بِرْكِه ودسمة كلّها من تعبنا وعرق جبينا- نطبخ المجدّرة، شيش البرك، المغربيّة، اللزازيق، العصيدة، الكبّة، العميشة والمحلّايات مثل الزّلابية والفشافيش في الشّتا أكثر اشي والبحتة والخبيصة، الهريسة، السّمسميّة، القرمش، الكشك، السّمبوسك، البربارة، الفريكة، المنزّلة، مرقة العدس والخضرا كلّها من الأرض نحشي الكوسه، القرع، الباذنجان، شيخ المحشي كل أنواع المحاشي، واللحمة المشوية يعني من العيد للعيد... كنّا نربي الصّيصان والسّخول والعجول احنا مسؤولين عنها.
كنا نجمع الخروب ندقّه ونبلّه ونفركه ونصفّي "ميْته" ونعاليه على النار تيغلي ويعقّد ويصير " دبس رُبْ" يستعمل لوجع البطن وللحلاوة العجميّة ( المصنوعة من " دبس الرّب" وطحين السّمسم) وكنّا نعمل تطلة سفرجل، ومشمش وخوخ، ونيبّس العنب تيصير العنب زبيب بعد ما يبس ع السّطح التّين ويصير تين يابس.
وكنّا نساعد في الحصيدة في تغمير القمح وتحميله على الشّواحر المحمّلة على الحمير وننقله الى البيدر لدرسه على لوح الدراس بواسطة الفرس أو الحمار أو العمّال. وبعد ما يندرس ويتذرّى نجمع القمح في اكياس والتبن في خيش دوغري ع التّبان. وأحلى ليالي الحصاد على البيادر كانت لمّا النّسوان تفزع يقصلّوا للّيْ، القصل قبل الدارس... كان الحرّاث يحرث عند الفلاح الملّاك عالرّبع أي إله ربع ناتج المحصول من قمح وشعير وعدس وفول وغيره... وكان الرّاعي العجّال وراعي الماعز والحلّاق ييجوا الى البيدر يستدوا مالهم من الفلاح من محصوله...
ومين يا ستّي ما جرّب العسكريّة الّي اخذوه الدّرك والعسكر على مصر او ع حدود تركيّا أو سوريا- كانت نسوان البلد تهكل هم ام الشّاب الّي تجنّد وسحبوه العسكر ان كان زمن تركيا والّا زمن الانجليز...

اقدر ردك وودك اخي الغالي عمر
يرحم امواتك
ابو فراس

ايام الحلال والقلوب الطيبة
هلق الحرام من كل الجهات ومنقول الزمن تغير
نحنا اللي تغيرنا ونحنا اللي ما عاد نرضا بي شي ولا يعجبنا شي
بس كلو رح ندفع ثمنو

الله يسامحنا

تحيى اخي موحد للموت اقدر ردك وودك ..
ابو فراس

تسلم اخي فجر ودمت لي
اقدر واعتز بردك وودك

الحلقه القادمه حدثني جدي

ما اجمل تراثنا وبساطتنا معها يطيب العيش بدون خزعبلات العصرنه الانيّه.

ابو فراس

ننتظر ما قاله جدك بفارغ الصبر